ජාතික රණවිරු සැමරුම් දින උත්සවය සඳහා හිටපු ජනාධිපති මහින්ද රාජපක්ෂ මහතා වෙත නිල වශයෙන් ආරාධනා කර ඇති බවට අමාත්ය උපාලි පන්නලගේ මහතා විසින් කරන ලද ප්රකාශය සම්පූර්ණයෙන්ම අසත්ය බව හිටපු ජනාධිපතිවරයාගේ මාධ්ය ප්රකාශක, නීතිඥ මනෝජ් ගමගේ මහතා පවසයි.
හෙට (19) දිනට යෙදී ඇති විජයග්රහණයේ රණවිරු සැමරුම් උත්සවය සඳහා පස්වැනි විධායක ජනාධිපති මහින්ද රාජපක්ෂ මහතා වෙත මේ වන තෙක් කිසිදු ආකාරයක නිල හෝ නොනිල ආරාධනයක් ලැබී නොමැති බව ඒ මහතා අවධාරණය කළේය.
ජනතාව නොමග යැවීමේ උත්සාහයක්
විශේෂ මාධ්ය ප්රකාශයක් සිදු කරමින් නීතිඥ මනෝජ් ගමගේ මහතා පෙන්වා දුන්නේ, ආණ්ඩුවේ අමාත්යවරයකු විසින් මෙවැනි අසත්ය ප්රකාශ සිදු කරනු ලබන්නේ රටේ පොදු මහත් ජනතාව නොමග යැවීමේ චේතනාවෙන් බවයි.
“අමාත්ය උපාලි පන්නලගේ මහතා ජනමාධ්ය වෙත ප්රකාශ කර තිබුණා හෙට පැවැත්වෙන විජයග්රහණයේ සමරුව සඳහා මහින්ද රාජපක්ෂ මැතිතුමාට ආරාධනා කර තිබෙනවා කියලා. මේක සම්පූර්ණයෙන්ම අසත්ය කතාවක්. මේ සන්ධ්යා යාමය වනතෙක් අප වෙත එවැනි කිසිදු ආරාධනයක් ලැබිලා නැහැ. ඒ නිසා අපි ඒ ප්රකාශය දැඩිව ප්රතික්ෂේප කරනවා වගේම ජනතාව නොමග යැවීමෙන් වළකින්න කියලා ආණ්ඩුවට කියනවා.”
– නීතිඥ මනෝජ් ගමගේ
මාලිමා රජයෙන් නිල දැනුම්දීමක් නෑ
පසුගිය රජයන් පාලන සමයන්හිදී මෙවැනි ජාතික උත්සව සඳහා ජනාධිපති ලේකම් කාර්යාලය හෝ ආරක්ෂක අමාත්යාංශය මගින් නිසි පරිදි නිල ආරාධනා පත්ර යොමු කළ ද, වත්මන් මාලිමා රජය යටතේ එවැනි කිසිදු ක්රියාපටිපාටියක් සිදු කර නොමැති බව මාධ්ය ප්රකාශකවරයා සඳහන් කළේය.
එමෙන්ම අමාත්ය උපාලි පන්නලගේ මහතා විසින් “අනෙක් ජනාධිපතිවරුන්ට වගේම මහින්ද රාජපක්ෂ මහතාටත් ආරාධනා කළා, ඔහුගේ විශේෂත්වයක් නැහැ” යනුවෙන් උපහාසාත්මක ස්වරූපයෙන් සිදු කළ ප්රකාශයට ද මනෝජ් ගමගේ මහතා මෙහිදී දැඩි ප්රතිචාර දැක්වීය.
“මහින්දව ඉතිහාසයෙන් මකා දමන්න බෑ”
තිස් වසරක කුරිරු එල්.ටී.ටී.ඊ. ත්රස්තවාදය සහමුලින්ම නිමා කර රටට සාමය උදාකර දීම සඳහා සේනාධිනායකයා ලෙස නායකත්වය දුන්නේ මහින්ද රාජපක්ෂ මහතා බව සිහිපත් කළ මාධ්ය ප්රකාශකවරයා, වත්මන් පාලකයන්ට ඔහු විශේෂ නොවූවත් රටේ ජනතාවට ඔහු සදාකාලිකවම සුවිශේෂී නායකයකු බව පැවසීය.
වත්මන් රජයේ ඇතැම් අමාත්යවරුන්ට මහින්ද රාජපක්ෂ මහතාව ඉතිහාසයෙන් මකා දැමීමේ වුවමනාවක් තිබුණ ද, යුද ජයග්රහණය සමඟ ඔහුගේ නාමය ශ්රී ලාංකීය ඉතිහාසයේ රන් අකුරින් ලියැවී ඇති බැවින් එය කිසිවෙකුටත් කිසිදා මකා දැමිය නොහැකි බව ද ඔහු වැඩිදුරටත් අවධාරණය කර සිටියේය.
